༧གོང་ས་༧སྐྱབས་མགོན་ཆེན་པོ་མཆོག་ནས།

སྣོད་ཞབས་མ་རྡོལ་བའི་ནང་ཆུ་བཀང་ན་མྱུར་དུ་ཁེངས་ནས་ལུད་པ་བཞིན་དུ། རྒྱུན་གཏན་པའི་རང་སྒྲིག་རང་སྲུང་དང་། ཆོག་ཤེས་ཡོད་ན་གཞན་དང་མཉམ་སྤྱོད་བྱེད་པ་ངང་གིས་འོང་།

ཉི་མའི་འོད་ཟེར་ཕྱོགས་ཐམས་ཅད་དུ་གཅིག་མཚུངས་སུ་འཕྲོ་བ་བཞིན་དུ། བཏང་སྙོམས་ཀྱི་བློས་ཉེ་དགའ་ཕྱོགས་ལྷུང་གི་རྒྱ་ལས་འདའ་བར་བྱེད་ཅིང་། བདེ་བ་འདོད་པ་དང་སྡུག་བསྔལ་མི་འདོད་པའི་གཞན་གྱི་གཞི་རྩའི་ཐོབ་ཐང་ལ་བརྩི་བཀུར་བྱེད།

སྣོད་བཅུད་ཀྱི་འཇིག་རྟེན་གཅིག་ནང་ཆོས་གང་ཡིན་རུང་རྐྱེན་གཞན་མཐའ་ཡས་པ་ལ་སྦྲེལ་བའམ་བརྟེན་ནས་ཡོད་པ་བཞིན་དུ། ང་ཚོ་མི་རེ་ངོ་རེ་སྤྱི་ཚོགས་ཀྱི་སེམས་ཅན་ཞིག་ཡིན་པས་སེམས་ཅན་གཞན་གྲངས་མེད་ལ་བརྟེན་ནས་གནས་ཡོད། རང་གི་བདེ་ཐབས་ལ་གཞན་གྱིས་མཐུན་སྦྱོར་ཇི་ལྟར་བྱེད་པ་ཤེས་ན་བཀའ་དྲིན་གྱི་ཚོར་བ་ཞིག་སྐྱེ་བར་འགྱུར།།

ཁ་རྒྱུན་དུ། གཞན་རྒྱུས་ལོན་དགོས་ན། རང་གིས་གཞན་གྱི་གནས་སྟངས་དེར་དངོས་སུ་ཞུགས་དགོས་ཞེས་པ་ལྟར། རང་གཞན་གྱི་གནས་སྟངས་བརྗེ་པོ་བརྒྱབས་ན་གཞི་ནས་གཞན་གྱི་ཚོར་བ་ལ་རྒྱུས་མངའ་ལོན་ཏེ། སྐྱིད་སྡུག་མཉམ་མྱོང་གི་ཚོར་བ་ཞིག་སྐྱེས་ནས་གཞན་ལ་རོགས་རམ་བྱ་རྒྱུའི་འདུན་པ་སྐྱེ་ངེས།

སྒྲོན་མེའི་འོད་ཇི་ཙམ་གསལ་པོ་ཡོད་པ་དེ་ཙམ་གྱི་ཉེ་འཁོར་གྱི་དངོས་པོ་རྣམས་གསལ་པོ་མཐོང་ཐུབ། དེ་བཞིན་དུ་མིའི་རྣམ་དཔྱོད་ཇི་ཙམ་ཆེ་ན། དེ་ཙམ་གྱིས་དངོས་པོའི་གནས་ལུགས་རྣམས་རྟོགས་ཐུབ། གནས་སྟངས་བྱེ་བྲག་པ་ཞིག་ལ་རང་གི་གོ་རྟོགས་དོན་དངོས་དང་མཐུན་ཏེ་ཆ་ཚང་བ་ཞིག་ཏུ་འགྱུར་རོ། །